Anak naghikog kay gilalis sa papa
CEBU, Philippines -Gumikan lang sa panaglalis bahin sa suweldo, usa ka anak naghikog pinaagi sa paghikot og wire sa telepono sa iyang liog didto sa Urban Poor Maghaway, sa dakbayan sa Talisay kagahapon sa kaadlawon.
Ang naghikog mao si Melchor Inajada, 25, nga nagpuyo sa nahisgutang lugar.
Matud pa ni Eduardo Reyes, barangay secretary sa maong lugar ang nakakita sa biktima nga nagbitay na sulod sa ilang balay mao ang ilang mga silingan kansang tumoy sa wire sa telepono maoy gihikot sa iyang liog ug ang pikas tumoy niini gigaid sa sagbayan sa ilang balay.
Nasayran gikan sa amahan nga sa wala pa maghikog ang iyang anak, gikainom pa niya kini uban sa usa nila ka higala sulod sa ilang balay, apan dihang nalasbag na sila nagkalalis sila bahin sa suweldo sa iyang anak.
Gumikan sa maong lalis milakaw siya samtang ang iyang anak iyang gibiyaan nga nag-inusara sa ilang balay.
Apan nianang pagkabuntag mao nalay nakita sa ilang mga silingan nga kini nagbitay na sulod sa ilang balay nga wala nay kinabuhi.
Walay nakita ang mga kapolisan nga kapasanginlang may foul play ang kamatayon sa biktima. (BANATNEWS)
- Latest
- Trending
