Laing bata patay sa dengue

CEBU, Philippines -Laing 12-anyos nga babaye ang namatay dinhi sa dakbayan sa Sugbo kagahapong adlawa tungod gihapon sa sakit nga dengue.

Giila ang labing uwahing biktima mao si Jovelyn Monsanto diha sa barangay T. Padilla nga wala matabang sa mga mananambal sa Chong Hua Hospital.

Base sa labing awahing talaan sa City Epidemiology Statistics and Surveillance Unit (CESSU) moabot na sa 30 ka kinabuhi ang nakalas sa siyudad tungod sa maong sakit.

Pito niini natala sa miaging buwan diin duha ang namatay sa barangay Apas ug tag-usa diha sa barangay Punta Princesa, Bacayan, Inayawan, Banilad ug barangay T. Padilla.

Moabot usab sa 216 ang natala sa CESSU nga dengue cases sa miaging buwan mas taas itandi sa susamang buwan sa miaging tuig nga wala makaabot og 100 ka kaso.

Sa kinatibuk-an, mukapin na sa 1,220 ka dengue cases ang nalista sa CESSU sa dakbayan sukad sa buwan sa Enero hangtud niadtong miaging buwan.

Kini mas taas gihapon itandi sa susamang period sa miaging tuig nga duna lay 1003 ka dengue cases ug duna hinooy 43 ang nakalas.

Nanghinaut ang Assistant City Epidemiologist nga si Durenda Macasucol nga dili madugangan ang mga makalas sa dengue sa mosunod nga mga buwan.

Giklaro ni Macasucol nga padayong gihingusgan sa kagamhanan sa dakbayan ang anti-dengue campaign niini nga giduyogan sa kabarangayan sa siyudad.

Sa samang higayon padayon usab nga giawhag sa assistant city epidemiologist ang mga Sugbuanon nga mokooperar sa ilang mga kalihukan.

Partikular na niini ang regular nga pagpanglimpyo sa palibot ug pagyabo sa napundong tubig diha sa mga ligid, flower vase ug uban pa.

Kini ilabi na nga padayong nasinati sa dakbayan ang mga pag-uwan nga maoy ting-itlog sa mga lamok nga maoy nagdala sa maong sakit. (Elly Bolonos) (BANATNEWS)