Joavan, mga kauban nakapiyansa

CEBU, Philippines - Gibuhian na sa kapolisan ang sinagop ni Mayor Socrates Fernandez sa Talisay nga si Joavan Fernandez ug ang tulo ka kauban niini human makapiyansa sa mga kaso nga ilang giatubang didto sa dakbayan sa Lapulapu.

Base sa nasayran sa Banat News gikan ni Municipal Trial Court in Cities Branch Clerk of Court Arlene Laude nga sa milabay’ng hapon, ang mga abogado ni Joavan nga si Atty. George Bragat ug abogado sa upat nga si Atty. Elmer Pacayra, mibutang sa piyansa sa ilang mga kliyente ngadto sa duha ka korte.

Kini human mihatag og pagtugot si Lapulapu City RTC Executive Judge Victor Teves nga makapiyansa ang mga akusado, gawas lamang ni Alinor Andangin nga adunay pending warrant of arrest sa kasong may kalambigitan sa ilegal nga drugas.

Matud pa ni Laude nga si Joavan ubos sa preliminary investigation sa piskaliya ug ang kasong illegal possession of firearms tungod sa kalibre .38 rebolber ug duha ka mga bala nga nakuha sa iyang posesyon usa lamang ka low-powered firearms hinungdan nga sa MTCC kini isang-at. Samtang ang kasong paghupot og ilegal nga drugas ug kagamitan sa RTC ipasaka.

Apan bisan pa nga wala pa mahuman ang imbestigasyon sa piskaliya, mahimong mopiyansa daan ang akusado kun hatagan kini og pagtugot sa korte.

Si Fernandez mipiyansa og P60 mil sa kasong illegal possession of firearms sa MTCC, samtang P200 mil sa RTC branch 54 sa kasong paghupot og 0.74 gramos nga shabu ug P40 mil alang sa paghupot og kagamitan sa paggamit og drugas.

Ang mga higala ni Joavan nga sila si Quazar Quiachon, Mark Ryan Vega Alcover ug Wilfredo Vega mipiyansa usab og P40 mil sa kasong paghupot og kagamitan sa paggamit og drugas.

Human sa pagpiyansa pinaagi sa usa ka surety bond sa ilang tagsa-tagsa ka abogado, pormal usab nga gibuhian ang mga suspetsado sa buhatan sa CIDG. Kahinumduman nga si Joavan nasikop sa Highway Patrol Group uban sa iyang upat ka mga higala sakay sa Isuzu Bighorn nga naggamit og wang-wang human sa ginukdanay gikan sa unang taytayan sa Mactan ug Mandaue sa milabay'ng Septiyembre 23, apan nasangit sa checkpoint sa Mactan Cebu International Airport. (BANATNEWS)