CEBU, Philippines - Inila nga druglord sa Sugbo nga nagpuyo sa dakbayan sa Lapulapu mitanyag og dakong kantidad sa salapi isip sinemana nga payola sa mga opisyal sa kapolisan bugti sa proteksiyon gikan sa mga awtoridad.
Gibutyag mismo ni Sr. Supt. Mariano Natuel, hepe sa Lapulapu City Police Office atol sa tulumanon sa DySS Super Radyo nga “Kapolisan ug ang Katawhan” matag alas 5 sa hapon, nga ang druglord miagni kaniya nga hatagan siya og pabor bugti sa dakong kantidad sa protection money gikan sa sindikato sa ginadiling drugas.
Sumala pa ni Natuel nga ang maong druglord nadakpan na sa kapolisan ug adunay kaso nga nagpadayon pa karon sa korte apan ang mga ‘galamay’ niini pabilin pa nga nag-operate.
“Dili lang ko mosulti kun pila gyud ang kantidad basta dako-dako gyud ang iyang gi-offer nako nga sinimanang madawat ug akong gi-turn down,” sumala pa ni Natuel.
Wala usab niya isalikway nga dunay mga polis nga nagprotehir og mga ilegal nga drugas apan wala pa hinuon siya makadawat og report nga aduna siya'y mga sakop sa Lapulapu nga nalambigit niini.
Nagdumili hinuon si Natuel pagbutyag sa ngalan sa druglord sa Lapulapu.
Gipadayag niini nga ‘identified’ na nila kining maong druglord nga nagpadayon sa ilegal nga negosyo, apan wala lang gyud silay igong ebidensiya aron ila gilayong masikop.
Gibutyag ni Natuel nga sukad sa iyang paglingkod kapin sa tuig isip hepe sa kapolisan sa Lapulapu, dunay mosobra sa 10 ka druglord nga kabahin karon sa ilang “order of battle” nga gitinguhang madakpan sa madaling panahon.
Hinuon, giklaro niini nga ang maong druglord naa lang magpuyo sa Lapulapu apan nag-operate sa gawas sa Lapulapu.
Nunot niini, nakig-alayon sila sa ubang mga unit sa kapolisan aron monitoron ang mga tawo nga nalakip sa “order of battle.”
Subay niini, ilang gipalig-on ang anti-illegal drugs campaign sa Lapulapu pinaagi sa pagpangayo og abag sa lokal nga kagamhanan ingon man sa mga opisyal sa barangay aron matabangan sila pag-monitor sa kalihukan sa sindikato sa drugas.
Sumala pa ni Natuel nga mihimo usab sila og koordinasyon sa mga private beach resort tungod sa report nga ang mga drug pusher nag-operate usab sa mga tourist spots, hotel ug resorts nga sagad dugokan sa mga turista.
Gibutyag ni Natuel nga misuporta sa ilang kampanya ang kagamhanan sa dakbayan sa Lapulapu ubos sa pamunoan ni Mayor Arturo Radaza.
Gigamit usab sa kapolisan ang mga crime volunteers sa maong kampanya ug gipalig-on ang police visibility pinaagi sa checkpoints sa kabarangayan. (BANATNEWS)