CEBU, Philippines - Miabot na sa 240 ka mga tawo ang nakalas ug 40 pa ka tawo ang giingong missing sa pagkuso-kuso sa bagyong Ondoy sa Luzon sumala pa sa National Disaster Coordinating Council kagahapon.
Sa report sa ABS-CBN, ang NDCC mipahibalo kagahapon sa buntag nga 101 niini gikan sa Metro Manila samtang 88 ang gikan sa Rizal Province.
Padayon pa ang search and rescue operation sa pagpangita sa 37 ka mga tawong na-missing ug lima ka tawo usab ang nangaangol tungod sa flashflood ug landslide nga miigo sa nagkalain-laing dapit sa Luzon.
Gibana-bana karong 1.87 milyones na ka tawo ang naapektahan sa maong bagyo ug gipaabot nga mosaka pa kini inig katapos na sa pagsusi.
Ang NDCC nagkanayon nga dunay 374,890 ka mga tawo ang kasamtangang gipahimutang sa 607 ka mga gidali-daling gitaod nga mga evacuation centers diha sa mga nagkadaiyang public schools sa Metro Manila, Rizal ug uban pang dapit sa Luzon.
Gibutyag usab sa NDCC nga mokabat sa P2.33 bilyones na ang nadanyos nga pananom ug kabtangan ang giguba sa bagyong Ondoy.
Si NDCC chairman ug Defense Secretary Gilberto Teodoro nagkanayon nga ang gobiyerno mipadala na og suwat hangyo sa ubang kanasuran sa pagpangayo og hinabang pinaagi sa United Nation Resident Coordinator.
Ang tanang tunghaan sa Metro Manila, Laguna, Rizal, Batangas ug uban pang dapit nga naigo sa grabeng epekto sa Ondoy wala una magbukas sa ilang mga klase.
Samtang gideklarar na usab ang mga lugar nga naapektahan nga ilawom sa state of calamity ug gibaharan ang mga negosyanteng di magpahimulos sa higayon pinaagi sa pagpataas sa ilang mga presyo ilabi na sa nag-unang palaliton. (BANATNEWS)