CEBU, Philippines - Ubay-ubay nga mga manindahay og bulak sa dalan Escaño ug Calderon diha sa Carbon Area ning dakbayan sa Sugbo ang gipang-abog atol sa gipahigayong clearing operation sa Market Operations Division kagahapong adlawa.
Gihatagan hinuon og tagsa-tagsa ka puwesto ang mga apektadong mga manindahay og bulak diha sa sulod nga bahin sa Freedom Park.
Kini ang hinungdan nga giingong wala usab mopakita og bayolenting reaksyon ang mga manindahay og bulak sa dihang gipabalhin.
Matud ni City Market Administrator Racquel Bohol-Arce nga ang 67 ka flower vendors gipetisyonan sa lehitimong mga manindahay tungod kay giingong pipila na lang ka mamalitay og bulak ang gikatahong mosulod sa Freedom Park mugna sa presensiya sa flower vendors sa kadalanan. “Ilang gireklamo nga menus ang halin sa sulod sa Freedom (Park) kay naa may naninda sa dalan, so, ang ilang request nga pasudlon lang aron patas kuno ba,” sumala ni Arce.
Gitataw hinuon sa market administrator nga mahimo nga makagawas sa Freedom Park ang nahisgutang manindahay panahon sa kagabhion, gikan sa alas 6 sa gabii hangtod sa alas 6 sa buntag. Apan mobalik ra usab sa gihatag kanila nga puwesto human sa nahisgutang mga oras.
Gipadayag ni Arce nga kadtong mga flower vendors nga dili mopatuo sa gipatuman nilang mga lagda mag-atubang unya og problema.
“Magpabilin gyud sila didto sa sulod sa Freedom kung maadlaw or else mawad-an sila og puwesto both sa sulod ug sa gawas,” nagkanayon si Arce.
Lakip sa giplanohan ni Arce nga dili na patindahon sa kadalanan diha sa Carbon area panahon sa adlawan mao ang namaligya og mga lamas. (BANATNEWS)