CEBU, Philippines - Patay ang usa ka supervisor sa usa ka supermarket sa dalan Colon human gidunggab sa iyang tuong lusong-lusong sa dihang gitulis sa usa ka minor de edad nga rugby boy niadtong Domingo sa alas 10 sa gabii diha sa Sitio Ipil, barangay Basak-San Nicolas, ning dakbayan sa Sugbo.
Namatay pipila ka gutlo human maabot sa Cebu City Medical Center (CCMC) si Charlita Ferolino, 30, minyo, dunay anak lalaki nga usa ka tuig, lumad nga taga Bohol ug temporayong nagpuyo sa naasoy’ng barangay ug nagtrabaho isip supervisor sa Colonnade Supermarket.
Samtang ang gitumbok nagdunggab kaniya mao ang sabog nga 17-anyos nga rugby boy nga gitawag lang sa ngalang “Clong Clong” nagpuyo sa nahisgutang lugar apan lumad nga taga barangay Sangi, dakbayan sa Toledo.
Ang rugby boy nadakpan human sa maong krimen sa dihang gigukod sa mga barangay tanod human mikatkat sa atop sa ilang panimalay. Nakuha ang mga ebidensya sa krimen nga mao ang “safety knife” nga may gitas-on nga kapin sa pito ka pulgada, pitaka sa biktima nga may sulod nga P120.
Sa imbestigasyon nilang SPO4 Alex Dacua sa Homicide Section gikatahong naglakaw si Ferolino sa nahisgutang lugar gikan sa iyang trabaho sa dihang kalit lang giatngan sa rugby boy ug gitulis, dayong dunggab sa tuong lusong-lusong niini.
Ang saksi nga usa ka sikyu nga si Allan Coyoca, taga Sitio Panagdait sa maong barangay mibutyag sa mga tigbalita nga iyang nakita gawas sa gate sa panimalay nga iyang gibisitahan ang rugby boy nga midunggab ni Ferolino kinsa nahagba dayon sa yuta.
Midali pagtawag sa mga silingan si Coyoca. Ang mga barangay tanod nga gipanguluhan ni Allan Cabillo misikop sa rugby boy.
Ang safety knife nga nagkadugo didto makuha ilawom sa higdaan sa panimalay sa rugby boy.
Ang bana sa biktima nga si Ramil, 27, mibutyag sa mga tigbalita nga nagbantay siya sa ilang anak sa dihang gitawag na lang siya sa ilang roommate nga nadunggaban ang iyang asawa.
Sumala pa niini nga nakaabot pa gawas sa ilang gipuy-an ang iyang asawa nga nagkadugo na. Tungod kay dili na makasulti, daling gidala sa CCMC si Ferolino apan gideklar sa mga doktor nga patay human sa pipila ka gutlo.
“Mo file gyud ko’g kaso... Gusto nako nga mapriso ang suspetsado bisan kun minor de edad nga dili na makagawas ug mamatay sulod sa prisohan,” sumala pa ni Ramil.
Dugang pa niini nga nananghid ang iyang asawa nga mag-overtime niadtong adlawa ug pagkahuman mangompra og mga kan-onon.
Ang inahan sa rugby boy nga si Nang Cory (apelyido gipugngan), usa ka beautician dinhi sa dakbayan, nagkanayon nga ang iyang anak naa na kini magpuyo sa iyang mga ginikanan ug iya lang kining pagahatagan og kunsomo nga makaon human usab sila biyai sa iyang bana.
Matud pa niini nga sa wala pa mahitabo ang krimen nianang adlawa, nakasab-an niya ang iyang anak human gibaligya niini ang cellphone ug P50 ug gipalit og ilimnong makahubog, samtang ang baffles sa sound system gidala didto sa ilang silingan ug nagpakusog og patukar.
Gipadayag niini nga gahi gyud kaayo og ulo ang iyang anak nga masuko na hinuon kun iyang tambagan nga mosukol ngadto kaniya ug magsige og kuyog sa mga barkada niini. Matud hinuon niya nga walay gang ang iyang anak.
Si Insp. Vicente Velaquez, hepe sa Homicide Section mibutyag sa mga tigbalita nga kasong robbery with homicide ang ipasaka batok sa rugby boy.
Apan ang pagbutang niini sa bilanggoan magdepende kini sa resulta sa evaluation sa taga Department of Social Welfare and Development (DSWD). Kun ang pagpatay kang Ferolino gihimo isip “act with discernment” adto kini ibalhog sa Cebu City Jail ug kun dili adto sa DSWD.
Dugang pa ni Velasquez nga problemado ang rugby boy tungod kay naglagot kini sa iyang inahan. (BANATNEWS)