Kabarangayan gipasidan-an

CEBU, Philippines - Mga graffiti sa palibot sa siyudad nakapasamot sa kabati sa imahen sa dakbayan ug gipahimangnoan ni Cebu City Acting Mayor Michael Rama ang kabarangayan nga di maghuwat sa dakbayan aron kini matagad.

Ang kagamhanan sa dakbayan mitukod na kaniadto og Anti-Graffiti Task Force nga gipanguluhan ni Konsehal Richard Osmeña ug namintal sa mga pader daplin sa kadalanan pipila ka adlaw sa wala pa ang Sinulog 2009 festival sa miaging buwan sa Enero.

Apan human niadto wala nay klaro ang komposisyon sa nahisgutang task force ug kini maoy usa sa sutaon ni Rama ug giawhag usab ang kabarangayan sa paglihok sa pagsulbad sa maong problema.

   Naglaum si Rama nga dili na maghuwat ang hingtungdang mga barangay officials ug mohimo na og kaugalingong mga lakang pagsumpo sa graffiti.

Lakip sa mga barangay nga giingong dunay daghang graffiti mao ang San Nicolas Proper, Pahina Central, Sambag I ug II, Labangon, Lorega-San Miguel, Zapatera, Tejero, Mabolo ug uban pa nga binuhatan sa mga sakop sa nagkadaiyang mga gangs ug fraternity sa dakbayan. Apan pipila ka barangay officials nga nahinabi sa Banat News nangangkon nang daang lisod para kanila nga masumpo ang maong problema tungod kay giingong mga menor de edad ang sagad mohimo niini. (Elly Bolonos)   (BANATNEWS)