Nabutha'g granadang polis pasidunggan

CEBU, Philippines - Gipasalamatan sa pangulo sa Police Regional Office (PRO-7) Chief Supt. Lani-O Nerez ang mga sakop sa kapulisan sa dakbayan sa Toledo human sa ilang gipakitang katakos sa pag-responde niadtong tawong nagdalag granada ug nakaangol sa usa ka police sa barangay Talavera.

Si Nerez nagkanayong tungod niini gantihan si PO3 Revocado Geseti og Medalya ng Sugatang Magiting human kini maangol sa pag-ulbo sa granadang gidala sa suspek nga si Noel Hernane, si Hernane namatay sa maong hitabo.

Si PO3 Geseti nagpaalim pa karon sa South General Hospital ug luwas na sa makuyaw ang kahimtang.

Samtang tun-an usab nila ang paghatag og award sa ubang mga police nga kauban ni Geseti ug kini ilang ibase sa report ni Supt. Julian Entoma, ang hepe sa Toledo Police Station.

Sumala pang Geseti nga dunay leksyong makuha ang kapolisan sa maong insidente, kini mao ang di pagkumpiyansa ilabi na sa pagtuman sa ilang trabaho.

Dugang niini nga ang Police Regional Office (PRO-7) maoy moabaga sa bayranan sa hospital sa maong police.

Samtang si Sr. Supt. Jesus Gaquing, director sa kapulisan sa lalawigan sa Sugbu nagkanayon nga ila karong paningkamutan nga ilang masubay kun diin gikan ang granada. (Guam Logroño)   (BANATNEWS)