CEBU, Philippines - Gi-ambusan ug napatay ang usa ka ginang kauban sa 10-anyos nga anak niini samtang paingon magkuha sa deklarasyon sa yuta sa iyang ugangan sa sitio Bayong barangay Malbago lungsod sa Daanbantayan niadtong Sabado sa alas 10:10 sa buntag.
Ang biktima nga patay nang nahidangat sa tambalanan mao si Julie Manglapos Pino, 45, molupyo sa sitio Cahipa barangay Hipodromo siyudad sa Sugbo kauban ang iyang 10-anyos nga anak nga lalaki (ngalan gipugngan). Wala pa mailhi sa kapolisan ang mamumuno sa ginang.
Matud ni PO1 Rosally Arnoco sa Daanbantayan Police dihang nahinabi sa Banat News, ang manag-inahan gikan pa sa dakbayan sa Sugbo paingon unta sa pinuy-anan sa iyang ugangang si Gomer Pino, sa sitio Badiang sa barangay Calape.
Kini aron pagkuha sa deklarasyon sa yuta sa iyang ugangan isip collateral sa kwartang gihuwaman niini kanila.
Subay sa inisyal nga imbestigasyon nga samtang naglakaw daplin sa karsada ang duha kalit lang mitunga sa hilit nga lugar ang maong tawo ug misunod kanila ug pag-abot sa maong lugar gipadul-an kini ug dayong gidul-itan og pusil ang ulo sa ginang.
Nahagba ang biktima nga nagkadugo ug tungod sa kahadlok mikaratel og dagan ang bata ug mao nay nagpahibawo sa kapulisan sa gidangatan sa iyang inahan.
Sa pag-abot sa nirespondeng mga polis nakasibat na ang gikatahapan maong gidala nalang nila sa Daanbantayan District Hospital ang biktima apan gideklarar kining dead on arrival tungod sa samad pinusilan sa ulo.
Ang 10-anyos nga bata mihulagway sa suspek nga nagsul-ob og kawo nga kolor orange, nagsul-ob og sweatshirt nga kolor itom ingon man itom nga maong nga karsones ug gibana-banang 5'5 ang gitas-on ug kasarangan ang pamanit.
Ang kapulisan padayun pa sa ilang imbestigasyon sa maong panghitabo ug apil sa gisusi ang posibilidad nga may kalambigitan sa na-prendang deklarasyon sa yuta sa ugangan niini nga buot untang kuhaon sa biktima ang motibo sa maong krimen. (BANATNEWS)