CEBU, Philippines - Imbistigahunon sa Ombudsman ang duha ka mga konsehal sa dakbayan sa Talisay human kini isumbong sa mga drayber sa multicab nga nagbiyahe sa Camp 4- Jaclupan-Tabunok nga rota, tungod sa giingong pagdapig sa maong mga opisyal sa illegal nga pamasahero sa mga habal-habal. Ang maong mga konsehal mao sila si Sabeniano Abatayo, chairman sa Committee on Transportation ug Arturo Bas, chairman sa Traffic Commission (TRAFCOM). Ang maong reklamo giduso ni Atty. Timoteo Gabison Jr., abogado sa United Camp 4-Jaclupan Multicab Operators and Drivers Association ngadto sa buhatan sa Ombudsman niadtong Septiyembre 17, 2009. Si Zaide Bacus, presidente sa nahisgutang grupo maoy miluwat og apidabit agi og suporta sa ilang reklamo. Si Bacus sa iyang apidabit mipasabot nga apektado ang ilang kinitaan tungod niining mga habal-habal. Kining mga habal-habal namasahero nga walay franchise busa wala sila magbayad og buhis itandi sa mga multicab nga nagbayad og prangkisa sa gobyerno. – BANAT NEWS