CEBU, Philippines - Dunay gitudlong 21 ka mga division chiefs sa Cebu City Treasurer’s Office isip mga Deputy City Treasurer aron mangulo sa bag-uhay lang gitukod nga revenue collection district sa siyudad.
Matud pa ni City Treasurer Ofelia Oliva nga ang mga deputy city treasurer anha unya magbase sa kabarangayan ug direktang mo-report kaniya.
Nagkanayon si Oliva nga ang tumong pagtudlo og mga deputy city treasurer mao ang paghatag og kasayon sa mga taxpayers ilabi na sa pagbayad sa ilang buhis.
Gawas niini, miingon ang City Treasurer nga masuhid na usab unya ang tanang mga balay patigayon sa nagkadaiyang kabarangayan sa dakbayan.
Ang City Treasurer nakig-alayon na sa nagkadaiyang barangay sa dakbayan alang sa katukuran sa 21 ka revenue collection districts tungod kay ang mga buhatan niini giingong anha ipahimutang sa mga barangay hall aron dali ra usab nga maduol sa mga magbubuhis.
Sumala pa sa maong buhatan nga daghang mga patigayong mi-operate sa mga barangay nga walay mga business permits ug pipila na niini ang gipasirad-an. – BANAT NEWS