CEBU, Philippines - Usa ang patay ug laing usa ang kritikal human aksidenteng nagkabinangga-ay ang nagkasugat nga duha ka motorsiklo sa Luray-II siyudad sa Toledo niadtong alas 6:00 sa niaging gabii.
Ang namatay paghiabot sa tambalanan mao ang drayber sa Honda XRM nga dunay plaka nga 612-GN nga si Romeo Bayadog, 63, ug molupyo sa barangay Daanlungsod sakop sa maong siyudad samtang ang drayber sa gikasugat niining motorsiklo mao si Feliciano Maya, 23, ug molupyo sa barangay Liki lungsod sa Balamban.
Subay sa imbestigasyon sa kapulisan si Bayadog gikan sa barangay Sangi, Toledo ug pag-abot niini sa maong lugar niaksyon kini og liko apan aksidenteng nadasmag sa semento sa tungang bahin sa dalan ug dihang iyang gibawi naatol usab nga niabot ang naghaguros nga gikasugat nga motorsiklo ni Maya.
Maayong pagkasungag sa ilang duha ka motor ug ang duha ka drayber pulos natagak ug nalamba sa semento hinungdan sa mga naangkon nilang mga samad ug pangos sa kalawasan.
Daling gihatod ang mga biktima sa Toledo City District Hospital apan tungod sa kaseryuso sa ilang kahimtang gibalhin sila sa South General Hospital sa Naga apan gideklarar nga dead on arrival si Bayadog ug nasuta sab nga wala kini lisensiya sa pagmaneho, gawas pa niini ang duha pulos wala pa magsul-ob og helmet. – BANAT NEWS