CEBU, Philippines - Polis nga nabuthan sa granada luwas na ang kahimtang samtang ang lalaking namatay apan nakaangol sa maong polis ug duha ka sibilyan nga mipaulbo og granada niadtong nilabay’ng hapon sa barangay Talavera usa diay ka kanhi police asset.
Gikatahong kanhi police asset si Nelson Hernani apan gumikan sa di maayong taras niini wala kini ilha sa Toledo Police Station. Si SPO1 Romero Agustenes ug ang naangol nga si PO3 Revocato Geseti misuway unta pagsikop kang Hernani apan dihang gikapkapan midagan kini ug diha na mahitabo ang pag-ulbo. Duha ka sibilyan nga sila si Arturo Araba ug Jamer Chavez nangalandig usab sa tambalanan. Si Geseti naigo sa splinters sa iyang gusok ug gidala sa tambalanan samtang sila si Araba naigo sa walang bahin sa nawong ug Chavez naigo sad sa abaga.
Si SPO2 Carmelito Hornales sa Toledo Police Station nga gikahinabi sa Banat News nagkanayon nga naguhay-guhay ang mga tiil ug kamot ni Hernani gumikan sa kakusog nga pagbusikad sa granada. Sumala pa niini nagdala’g .38 revolver nga may unom ka buhing bala si Hernani maong girespondehan kini sa maong mga polis ug nakuha ang maong armas. Apan dihang gikapkapan, kalit kining midagan hinungdan nga nahitabo ang ginukuray ug sa kalit lang gikuha niini sa iyang bulsa ang granada ug nibuto. Si Sr. Supt. Jesus Gaquing, pangulo sa kapulisan sa lalawigan sa Sugbu nga gikahinabi sa Banat News nagkanayon nga luwas na sa makuyaw nga kahimtang si PO3 Geseti diha sa South General Hospital sa lungsod sa Naga. Samtang gibutyag usab niini nga si Police Regional Office (PRO-7) Chief Supt. Lani-O Neres kinsa miduaw kang PO3 Geseti, mibutyag nga gusto niyang susihon kung may lapso ang mga polis sa pagresponde. Si Insp. Welfredo Pulvera, deputy chief sa Toledo police station mibutyag nga sa tigbakayan sa nahisgutang barangay gialarma si Hernani tungod sa armas niini. – BANAT NEWS