Tigpayuhot og drugas gikasohan

CEBU, Philippines - Gipasakaan na kagahapon og kaso sa kapolisan sa dakbayan sa Lapulapu ang duha ka mga dinakpan sa pagpayuhot og shabu gumikan sa paglapas sa Republic Act 9165 kon Comprehensive Dangerous Drugs Act.

Ang duha nga napasakaan og kaso mao sila si Lilebeth Espra, 39, nga taga Ibabao, Basak, dakbayan sa Lapulapu ug Arvi Obregon, 18, nga taga barangay Day-as sa lungsod sa Cordova. Nadakpan si Espra sa buy bust operation nga gipangulohan ni SPO2 Rex Cabrera sa kapolisan sa dakbayan sa Lapulapu ug nasakmitan og tulo ka paketeng shabu samtang si Obregon nasikop usab nila ni SPO2 Llovero Agosto sa kapolisan sa lungsod sa Cordova gumikan gihapon sa pagpayuhot og ginadiling drugas.

Nagkagulkol na sila karon sa prisohan sa kapolisan sa maong dakbayan. (Romeo T. Limpangog) BANAT NEWS