Karne gimonitor kun wa bay kemikal
CEBU, Philippines - Nakakuha og suporta dinhi sa dakbayan sa Sugbu ang implementing guidelines sa National Veterinary Drug Residue Control Program atol sa ikatulo ug katapusang public consultation nga gipahigayon sa Department of Agriculture (DA-7) kagahapong adlawa.
Usa sa nihangop alang sa dinaliang implementasyon sa nahisgutang programa mao si City Veterinarian Doctor Alice Utlang tungod kay pinaagi niini masiguro na unyang luwas ang mga karne gikan sa gidili na nga mga tambal.
Kini tungod kay ipaubos sa inspeksyon ang mga food animals sa dili pa mabaligya kung wala ba dapati og antibiotics nga delikado sa panglawas sa tawo.
“Nindot ni kay aron ma-trace nato kung ang karne naa bay drug residue nga gibawal na ba kay lisod kaayo makaon unya nato,” sumala ni Utlang.
Ang National Veterinary Drug Residue Control Program posibleng mapatuman sa hinapos nga bahin niining tuiga o sa sayong bahin sunod tuig.
Matud ni Utlang nga kini hugot niyang suportahan ug ipatuman dinhi sa dakbayan sa higayon nga mahingpit na ang gikinahanglang mga rekisitos. (Elly Bolonos) BANAT NEWS
- Latest
- Trending
