Motor gi-hit and run misampak sa Center Island usa ang patay

CEBU, Philippines - Wala na makaabot sa tambalanan ang usa ka lalaki samtang samdan ang kuyog niini human kini matumba ug nasampak sa center island ang gisakyan nilang motorsiklo sa dalan Osmeña Boulevard pasado ala-una sa kaadlawon dihang nasaghiran og laing sakyanan.

Ang namatay nailhan nga si Michael Lopez, 31, taga Ma. Theresa Villa, sa barangay Guadalupe samtang ang angkas niini nailhan nga si Jackspade Cabreros, 28.

Nasayran nga ang duruha gikan sa Capitol Area padulong na sa Guadalupe sa diha nga miagi sa Fuente Osmeña dihang kalit lang nga may misaghid sa ilang motor.

Gumikan niini nawad-an og kontrol sa manobela si Lopez ug adto nasampak sa center island, ang sakyanang nakaigo kanila wala manumbaling sa nahitabo ug misutoy paikyas sa lugar.

Bugtong natiman-an ni Cabreros mao nga kolor puti ang sakyanang nakaigo kanila ug karon gisubay pa sa kapolisan ang dugang impormasyon pagtumbok sa mga gikatahapan.

Si Cabreros padayon pa nga nagpatambal sa Cebu City Medical Center. (Lesley Caminade) BANAT NEWS