Dugang 34 ka kaso ang natala sa Cebu City

CEBU, Philippines - Dugang 34 ka mga molupyo sa dakbayan sa Sugbu ang nataptan sa makamatay nga sakit nga dengue niadtong miaging semana.

Kini base usab sa labing uwahing talaan nga gipagawas sa City Epidemiology Statistics and Surveillance Unit (CESSU) sa City Health Department.

Wala hinuoy gikatahong kinabuhing nakalas sa mga biktima, apan sa pagsuwat ning balita pipila niini ang gikatahong nagpabilin pa sa tambalanan.

Sa kinatibuk-an, muabot na sa 1,110 ka dengue cases ang natala sa CESSU sukad sa buwan sa Enero hangtud niadtong Septembre 19.

Kini mas taas itandi sa mga kaso sa susamang period sa miaging tuig nga duna lay 981 ka dengue cases nga natala ang CESSU.

Nakatala og kinatibuk-ang ihap nga 25 ang nakalas sa maong sakit hangtud niadtong miaging semana, kini mas ubos itandi sa susamang period sa miaging tuig nga 40 ang namatay.

Apan ang maong gidaghanon gikahadlukang mosaka pa sa mosunod nga mga adlaw, tungod usab sa mga pag-uwan nga nasinati sa dakbayan.

Subay niini, ang City Assistant Epidemiologist nga si Durenda Macasucol subling nanawagan sa publiko nga motabang sa ilang kampanya.

Kini pinaagi usab sa kanunay’ng pagpanglimpyo sa pinuy-anan ug ipangyabo ang napundong tubig diha sa mga ligid, flower vase ug uban pa. (Elly Bolonos) BANAT NEWS