Bagyong Ondoy mikuso-kuso sa Luzon

CEBU, Philippines - Gikuso-kuso sa bagyong Ondoy kagahapon ang Baler, Aurora ug ubang bahin sa Central Luzon ug gilunupan ang Metro Manila.

Base sa gipagawas nga forecast sa Philippine Atmospheric and Geographical Scientific Administration (Pagasa) kagahapon si Ondoy 130 kilometro southeast sa Baler, Aurora ug 90 kilometro sa East Northeast sa Infanta, Quezon ug may gikusgong hangin nga 85 kilometer per hour (KPH) duol sa sentro niini ug moabot ngadto sa 100 kilometro matag oras.

Ang Central Luzon ug ang probinsiya sa Pangasinan, La Union, Benguet, Nueva Vizcaya, Quirino,Rizal, Quezon ug Camarines Norte gipahimangnoang makasinati og dili maayong panahon ug gipahimangnoan ang mga residente sa pagbantay ilabi na ang duol sa mga landslide prone areas ug ingon man kasapaan.

Samtang si Ella Cumahig sa Pagasa Mactan sa pakighinabi sa Banat News miingon nga di kaayo apektado ang Central Visayas gumikan kay hinungaw lang ang hangin ug pag-uwan dinhi apan kini mipahimangno sa mga gagmay’ng sakyanan sa kadagatan gumikan sa dagkong balod nga mamugna niini.

Ang Philippine Coast Guard Cebu Station mipahibalong walay barkong gidid-ang makalawig kagahapon apan dunay tulo ka barkong na-stranded ug wala palawiga. Ang maong mga barko mao ang MV Maria Cristina ug MV Delta One nga biyaheng Siquijor ug Super Shuttle Ferry 22 padulong sa Dapitan nga may 150 ka pasahero wala palargaha sa Dumaguete.

Si Lt. Michell Ursabia, ang public information officer sa Coast Guard mitug-an sa Banat News nga nasangad human maguba ang timon sa barkong MV Island Express 2 nga padulong sa Tubigon, Bohol kagahapon sa alas 10 sa buntag sa Lawis, South Channel.

 Duna kini sakay nga 131 ka pasahero ug tripolante apan luwas nga nakabalik sa Pier 3 sa dakbayan human giguroy sa kaubang barko.

Samtang hasta ang pipila ka domestic flights padulong sa National Capital Region gikan sa Cebu-Mactan International Airport nadelatar tungod usab sa maong bagyo. (Brenda Batuto ug Lesley Caminade) BANAT NEWS