CEBU, Philippines - Lain na usab nga satellite registration ang gipahigayon sa Cebu City Comelec South District sa usa ka tunghaan dinhi sa dakbayan kagahapong adlawa.
Niining higayona, ang off-site registration gihimo sulod sa Cebu Institute of Technology (CIT) diha sa Natalio Bacalso Avenue ning siyudad.
Gatusan ka mga estudyante ang nakaparehistro sa gipahigayong satellite registration nga naglakip sa mga molupyo sa barangay Labangon, Tisa, Punta Princesa, Basak San Nicolas, Cogon Pardo, Poblacion Pardo, Mambaling, ug uban pa.
Gipadayag ni City Election Officer Edwin Cadungog nga kini ilang gihimo aron mapaduol ang ilang buhatan ngadto sa mga botante.
“Hapit nang deadline, so, as much as possible makakuha ta sa kinabag-an sa angayang mobutar nga wa pa makaparehistro ug niadtong mo-transfer sa registration,” matud ni Cadungog.
Karong adlawa, ang mga sakop ni Cadungog adto na usab mopahigayon og satellite registration sa bukirang barangay sa Bonbon aron mahatagan usab og kahigayunan ang mga molupyo sa maong dapit nga gustong marehistro apan dili makalugar pagduaw sa buhatan sa Comelec.
Nagkanayon si Cadungog nga kadtong mga molupyo sa kasikbit nga mga barangay sa Bonbon mahimo gihapon nga makaparehistro karong adlawa.
Sumala ni Cadungog nga ang Comelec South District katapusang mopahigayon og satellite registration karong sunod nga Sabado diha sa barangay Buhisan.
Subling nanawagan ang city election officer ngadto sa wala pa makaparehistro nga mupahimulos sa ilang gihatag nga higayon pinaagi sa off-site registration. - Elly Bolonos (BANAT NEWS)