Dropouts gipaabot nga mo-menus sunod tuig
CEBU, Philippines - Gipaabot nga moubos ang dropout rate sa mga tinun-an sa publikong mga tunghaan sa dakbayan sa Sugbu sa kasamtangang tuig-tingtungha tungod usab sa giingong mga pamaaging gihingusgan ug gipatuman sa City Schools Division ug sa kagamhanan sa dakbayan.
Partikular na niini ang Alternative Learning System (ALS) sa Department of Education (DepEd) nga gisagop usab sa City government, matud pa ni City Hall Education Consultant Joy Augustus Young nga dili makonsiderar nga dropout ang usa ka tinun-an kung kini mabalhin ngadto sa ALS.
“Kanang ALS home study man na, so, dili man na ma-consider nga dropout ang tinun-an ana kay nag-eskwela man gihapon siya,” sumala ni Young.
Kini gidasunan usab sa planning officer sa City Schools Division nga si Fe Catingub nga nihangop sa pagtabang sa kagamhanan sa dakbayan kanila.
Dili pa hinuon makahatag og gidaghanon ang City Schools Division sa dropout rate sa kasamtangang tuig tingtungha ingon man niadtong nibalhin sa ALS.
Apan sa miaging school year, moabot sa 851 gikan sa 89,491 ka mga tinun-an sa elementarya sa publikong mga tunghaan sa dakbayan ang nihunong sa pagtungha.
Mas taas ang dropout sa high school sa miaging tuig-tingtungha tungod kay kini niabot sa 2,992 gikan sa 40,063 ka mga estudyante o pito ka porsiyento.
Apan matud ni Young nga ang nahisgutang dropout rate mas ubos itandi sa gidaghanon sa miaging pipila ka mga nanglabay’ng tuig tingtungha. – BANAT NEWS
- Latest
- Trending
