Nag-unang news sources sa Sugbo

CEBU, Philippines - Nag-una sa talaan sa mga sakop sa media si Cebu City Mayor Tomas Osmeña isip maoy labing daling duolong news source human sa gihimong tinuig nga survey sa Cebu Federation of Beat Journalist karong tuiga.

Tumong sa maong survey ang pagpahibalo sa publiko kun si kinsang mga personalidad sa Sugbu ang daling mapangayoan og impormasyon sa media sa karong tuiga, may labot sa mga kontrobersiya ug isyu ingon man mga mahinungdanong impormasyon alang sa katilingban. Sunod kang Osmeña mao si Cebu Gov. Gwendolyn Garcia; Provincial Board Member Victor Maambong; Police Regional Office (PRO) 7 Chief Supt. Lani-O Nerez; Tourism Secretary Ace Durano; Regional Trial Court Judge Geraldine Econg; Linao, Talisay Barangay Councilor Val Ylanan; Acting Immigration 7 Director Casimiro Madarang; Mandaue City Vice Mayor Carlo Fortuna; Cebu City Police Office’s Investigation and Detective Management Branch (IDMB) Sr. Supt. Paul Labra ug Businessman Glen Soco.

 Ang matag beat reporter misumitir og kaugalingong mga pangalan sa mga news sources ug gibutohan nila kini base sa standards ug pamatasan sa news sources, 75 porsiyento sa pag-rate sa news sources gikuha sa ilang standards. Kini maoy ikaduhang tinuig nga survey sa CFBJ nga gisugdan sa milabay’ng tuig. Ang survey sa CFBJ inabagan sa Sun.Star Cebu, gituyo aron madani pa ang mga news sources nga palambuon pa ang ilang pakiglambigit sa mga reporters nga ilang makaatubang ug aron usab mapaabot ang mga impormasyong dunay interes ang publiko. Diha sa standards mao ang daling access sa media sa news sources ug sa mga materyal nga naa sa kontrol niini, klase sa impormasyong iyang mahatag, iyang pamaagi sa pakig-estorya niini ngadto sa reporter, ug ang pagkamasinabtanon sa source sa mga reporter nga moduol kanila. – BANAT NEWS