Mga imnanan hatagan higayon tugtan mo-operate
CEBU, Philippines - Gihatagan karon ni
Mayor Tomas Osmeña og higayon ang mga imnanan sa dakbayan nga duol og mga tunghaan nga mangayo og pagtugot nga maka-operate aron dili magproblema bisan pa man kun nagbayad og buhis sa kagamhanan sa dakbayan, sama sa kontrobersyal nga Bakak Restobar diha sa dalan Pelaez. Matud ni Osmeña nga 30 ka adlaw lang ang iyang gihatag nga tagal ngadto sa maong matang sa balay patigayon partikular na niadtong nasulod sa 100 meter radius.Gipadayag sa mayor nga kun makakuha og pagtugot sa mga tunghaan ang mga imnanan siya dili mubabag niini nga maka-operate.
Base sa ordinansa sa siyudad, walay imnanan nga tugotang maka-operate duol sa mga tunghaan partikular kung kini nasulod sa 100 meter radius.
Apan duna hinuoy amendatory ordinance niini nga nagtugot sa maong mga balay patigayon nga makakuha og special permit gikan sa City Hall.
Nagkanayon si Osmeña nga kun ang mga tunghaan dili mobabag sa operasyon sa mga hingtungdang mga imnanan, kini makapadayon sa ilang operasyon. “It’s up to the schools, sila man ang maka-benefit ana, if the schools have no objections, I will not have any objection, ” sumala ni Osmeña.
Nasayran hinuon nga ang Dean sa College of Law sa University of San Carlos nga si Alex Monteclar nireklamo na sa maong matang sa establisamento diha sa dalan Pelaez tungod sa kasaba ug disturbo sa trabaho. – BANAT NEWS
- Latest
- Trending
