Joavan gipasakaan na

CEBU, Philippines - Pormal nang gipasaka ngadto sa Office of the City Prosecutor sa Lapulapu ang tulo ka kasong giatubang ni Joavan Fernandez human kini masikop sa mga sakop sa Highway Patrol Group (HPG) nga nakalapas sa balaod sa trapiko ug nakuhaan og mga pakete sa shabu ug armas nga walay lisensiya sa milabay’ng hapon duol sa Mactan Cebu International Airport.

Ang upat ka kasong giatubang ni Fernandez mao ang kalapasan sa Akta Republika 8294 tungod sa paghupot og armas nga kalibre .38 rebolber ug duha ka buhing bala; kalapasan sa Akta Republika 9165 Art. II ubos sa Sec. 11 ug 12 gumikan sa nakuhang tulo ka paketeng shabu ug ang kalapasan sa lagda sa trapiko.

Samtang ang upat niini ka mga kauban nga sila si Quazar Quiachon, Alinor Andingan, Mark Ryan Alacover ug Wifredo Vega nag-atubang lamang og   kasong kalapasan sa RA 9165 may kalambigitan sa pagkakuha sa ilegal nga drugas ug kagamitan sa pagsuyop niini.

Si SPO3 Danilo Gallano, team leader sa HPG ug mga kaubanan nga maoy nakasikop ni Joavan personal nga mipasaka sa mga kaso ngadto sa piskaliya human mapaubos sa inquest proceeding ni Lapulapu City Prosecutor Ruso Saragoza.

Lakip sa mga ebidensiya nga gisukip sa HPG mao ang positibong resulta sa tulo ka paketeng shabu (0.74 gramos) nga nakuha sa kapolisan sa usa ka attaché case diin gidudahan ni SPO3 Gallano nga posibleng aduna pay mga ilegal nga drugas nga gilabay sa mga suspetsado atol sa ginukdanay.

Ang abogado ni Joavan nga si Atty. George Bragat ug abogado sa upat ka kauban niini nga si Atty. Elmer Pacayra atol sa maong inquest proceeding nangayo og waiver of detention sa ilang mga kliyente ug miyamar og preliminary investigation.

Kahinumduman nga sa milabay’ng hapon, ang sinagop ni Mayor Socrates Fernandez sa Talisay nga si Joavan nasikop sa HPG uban sa upat ka mga higala tungod sa pagsugat sa ubang sakyanan sa dili iyang dalan ug migamit og siren.

Nadakpan kini duol sa checkpoint sa MCIA. – BANAT NEWS