CEBU, Philippines - Gipatay sa bana ang usa ka lalaki nga gikauban sa pagpangaon sa iyang asawa didto sa Sitio Canticson, barangay Gairan, lungsod sa Bogo kagahapon sa alas 12 sa udto. Ang biktima mao si Ignacio Rivera, 31, nagpuyo sa nahisgutang lugar samtang ang mamumuno mao si Gerardo Somayang Muñez, 46, nagpuyo ra gihapon sa maong dapit.
Matud ni SPO4 Emmanuel Masong sa Bogo Police Station sa dihang nahinabi sa Banat News selos ang gituohan nilang motibo sa nahitabong krimen sanglit subay sa inisyal nila nga imbestigasyon nasuta nga ang biktima kauban ni Ferlin ang asawa ni Gerardo nga nangaon.
Daling miduol ang suspek dayong dunggab ni Rivera makadaghang higayon ug gidali paghatod sa Verallo District Hospital apan gideklarar nga dead on arrival.
Samtang ang suspek nadakpan usab dayon sa miresponde nga mga polis ug gibalhug na karon samtang nagpaabot sa tukmang kaso nga ipasaka batok niya.
Matud pa nagduda ang suspek nga dunay relasyon si Rivera ug ang asawa niini ug nasakpan pa niya kini nga nagdungan og pangaon hinungdan nga wala siya makapugong ug gidunggab ang biktima ug nakaangkon og daghang samad sa kalawasan.
Hinuon gipalawman pa ang imbestigasyon sa maong panghitabo ug nangita pa og dugang mga saksi kabahin sa nahitabong krimen. – BANAT NEWS