Joavan makamulta: LTO

CEBU, Philippines - Ang kadagkuan sa Land Transportation Office (LTO) andam mopasaka og kaso batok sa sinagop ni Talisay City Mayor Socrates Fernandez nga si Joavan Fernandez tungod sa pagbalhin sa LTO red stickers nga giisyu ngadto sa sakyanan sa gobyerno ngadto sa iyang pribadong sakyanan.

Sumala pa ni LTO-7 regional director Raul Aguilos nga kasong illegal transfer of stickers ang atubangon ni Joavan human namatud-an sa ilang buhatan nga gibutang ang red stickers ngadto sa atubangan nga plate number sa Izusu Bighorn niini sa dihang nadakpan sa mga sakop sa Highway Patrol Group niadtong Martes sa Lapulapu.

Si Aguilos nagkanayon nga sa iyang pakisusi, ang sakyanan didto nakarehistro sa pangalan ni Joavan.

Gitataw ni Aguilos nga ang maong red sticker adto ra gyud kini i-isyu ug ipapilit sa red plate sa sakyanan sa gobyerno ug dili sa usa ka pribadong sakyanan.

Matud pa ni Aguilos nga posibleng pamultahon si Joavan og P20 mil   tungod sa iyang gihimo.

Gidugang pa niini nga nakadawat siya og report gikan ni Bernardo “Dodong” Borromeo, ang hepe sa LTO-Talisay nga posibleng gikuha ni Joavan ang red sticker sa motor pool sa dakbayan sa Talisay ug gibalhin sa iyang sakyanan aron makalikay kini sa dakop sa mga operation sa kapolisan.

Si Aguilos miingon hinuon nga makig-alayon pa siya sa Highway Patrol Group kun si kinsa kanila ang mopasaka og kaso batok sa sinagop sa mayor sa Talisay.

Kagahapon, gipaubos sa drug test si Joavan sa PNP Crime Laboratory, samtang ang kapolisan padayong nagtuon sa kasong ipasaka batok kang Joavan. – BANAT NEWS