CEBU, Philippines - Usa ka “Walk for Peace” ang gitakdang pasiugdahan sa Anad Partylist ug News Guardians Inc. sa Metro Cebu Chapter nga gipangulohan ni FRM Raul “Boy” Carin karong umaabot nga Domingo, Septiyembre 26, 2009.
Ang maong kalihukan himoon agi’g suporta sa programa sa konseho ning dakbayan nga nagdeklarar sa tibuok bulan sa Septiyembre ning tuiga nga Interfaith Peace Month .
Si FRM Carin miingon nga may kagatusan ka tawo ang mosalmot ning maong kalihokan.
Matud pa niya nga ang maong lakaw manukad sa kinapusorang bahin sa dakbayan ug motuyok kini sa nagkalainlaing kadalanan ug suok sa siyudad .
Midugang si Carin nga lakip sa mosalmot sa maong kalihokan mao ang mga kahugpongan sa mga batan-on ug ingon man ang kahugpongan sa Citizen Police Auxiliary Group (CPAG) Cebu City Quick Response Team (CCQRT) Cebu Association of Media Practitioners (CAMP) , Partners Club Original, ug uban pa.
Sa maong higayon manumpa usab ang mga opisyal sa CPAG 2009 nga mao sila si SPO1 Richard Catacutan isip presidente, Sinforiamo Castillo, vice president for international, Art Montelibano, vice president for external affairs, Leonardo Braza Jr. nga maoy secretary, Rey Castillo, Edgar Nerves nga maoy auditor, mga board of trustee mao sila si PO3 Greg Coraminas, Rodrigo Casiano, Tito Serencio, Hendrik Orbiso, Benedictol Comaringking, Jerome Granada, Arthur Gacasan, Gene Nerves ug Stephen Flores. - Romeo T. Limpangog (BANAT NEWS)