Tawo nagpabuto og flare gun sikop

CEBU, Philippines - Usa ka tawong nagpabuto og flare gun sa miaging gabii didto sa sitio Aroma, barangay Subangdaku , dakbayan sa Mandaue gisikop sa kapolisan tungod kay nag-atubang diay kini og kasong murder.

Ang suspetsado giila sa kapolisan nga si Michael Tabocor Dominguez, 28, ulitawo nga taga lungsod sa Oslob.

Matud pa ni SPO3 Alfredo Andales sa Presinto 2 sa Subangdako Police Station nga sa wala pa nila dakpa si Dominguez, nadawat nila ang reklamo sa mga molupyo sa sitio Aroma kinsa gipakuyawan sa nahauna pinaagi sa gipabuto niining flare gun.

Matud pa ang uban ginerbiyos ug natarantar sa kakuyaw kay nagtuo sila nga nasunog na usab ang ilang lugar gumikan sa kahayag sa kayo nga mugna sa flare gun ni Dominguez.

Gani ang uban nangapiang ug nangasamad dihang nasukamod ug nabangga sa gahing mga butang, may nahagbong sa hagdan ug nangaligid sa kakurat sa ilang nakitang kayo sa ilang palibot. May bag-ong nagmata nga sa pagtuo nga nasunog na ang ilang silingan nakuyapan sa kakuyaw. Sa dihang nasikop na sa kapolisan si Dominguez, nasayran nga nag-atubang diay kini og kasong murder apan wala hidakpi sa kapolisan.

Sa pagkakaron hayahay na kaayo si Dominguez sa prisohan sa Subangdaku. - RTL (BANAT NEWS)