Cyber sex gitago na's mga operator
CEBU, Philippines - Gihulagway sa Cebu City Anti-Indecency Board (CAIB) nga nagkagrabe na ang cybersex dinhi sa dakbayan sa Sugbo.
Matud ni CAIB chairman Rene Josef Bullecer nga giusab na ang estratehiya sa mga operator og cybersex den. Human makontrolar ang mga internet café, gibalhin sa pribadong mga pinuy-anan ang cybersex operation.
Nakadawat og taho si Bullecer gikan sa kapolisan nga nagtumbok sa usa ka barangay sa siyudad nga dunay pipila ka cybersex operator.
Maglisod na ang CAIB sa pag-monitor ug pagpahigayon og surveillance sa mga pribadong balay diin gihimo ang cybersex.
“Ipa-identify gyud namo og klaro kay I don’t believe nga usa ra ni ka barangay then among tagaan og kopya ang barangay sa surveillance report sa mga polis ug sa mga concerned citizen then among i-draw back nila ang maong obligasyon,” sumala ni Bullecer.
Nanawagan si Bullecer sa mga Sugbuanon nga magpakabana sa nahisgutang problema.
Gitataw ni Bullecer nga ang CAIB taliwala sa kakuwang og pundo, padayong naningkamot nga mapatuman ang Anti-Indecency Ordinance sa dakbayan, ilabi na nga gisaulog sa dakbayan ang tibuok buwan sa Septembre nga CAIB month uban sa tema nga “A Clean and Descent City Starts With Me.”
Subay niini, ang mga sakop sa CAIB mopatawag og usa ka press conference sunod semana, aron iyagyag ang ilang mga accomplishment pagpatuman sa ordinansa. (Elly Bolonos) (BANATNEWS)
- Latest
- Trending
