Mi-ismukoy sa misis sa igsuon gitigbas

CEBU, Philippines - Naputos sa samad tinigbasan ang usa ka 29 anyos nga ulitawo human kini masakpi sa iyang maguwang nga nakig- relasyon sa asawa niini ug nag-abot-abot sa usa ka langub dili layo sa ilang pinuy-anan didto sa barangay Liki,   Sogod kagahapon sa alas 6:55 sa buntag.

Si Celestino Arangco Roflo, 29, ulitawo, gitigbas sa iyang maguwang nga si Wilson Roflo, 35, minyo ug usa ka mag-uuma ug pulos molupyo sa nahisgutang lugar.

Matud ni SPO1 Arsenio Coming Sr. sa Sogod Police Station sa dihang nahinabi sa Banat News nga ang biktima matud pa naabtan sa maguwang nga suspek   sa usa ka langub dili layo sa ilang pinuy-anan.

Dugang nahipos nga impormasyon sa kapolisan nga ikaduha ka higayon na nga nasakpan ni Wilson ang iyang asawa nga nakigtagbo sa iyang manghod   apan iya ra kining gipasaylo sa kondisyon nga dili na subling buhaton nila ang maong tago-tago nga relasyon.

Apan kagahapong adlawa, subling nasakpan ni Wilson ang iyang asawa nga nakigtagbo sa iyang manghod sa usa ka langub dili layo sa ilang balay hinungdan   iyaha kining gi-ukoy. Sa dihang nakit-an na niya ang duha wala makapugong si Wilson, gitigbas sa gibitbit niyang sundang si Celestino ug maayo na lang gani kay nakabantay ang asawa niini ug nakahigayon sa pagdagan pahilayo.

Matud ni SPO1 Coming nakaangkon og daghang samad tinigbasan si Celestino agi sa sundang sa wala ug tuong bahin sa ulo, walang bahin sa tuhod ingon man tuong bahin sa iyang kamot gumikan sa pagpanagang. Gidala kini sa tambalanan.

Samtang sa pagka alas 9 sa buntag kagahapon gi-turnover sa mga tanod sa barangay si Wilson nga didto mo-surrender ni Kapitan Ricardo Vanguardia ug nabalhog na karon sa detention cell samtang nagpaabot sa tukmang kaso nga ipasaka batok niya. (BANATNEWS)