CEBU, Philippines - Patay ang duha ka drayber ug naangol ang upat ka mga pasahero apil na ang 7-anyos nga bata human magkabangga ang duha ka motorsiklo didto sa kurbadahon nga bahin sa Sitio Kamansi, barangay Mojon, lungsod sa Sogod niadtong Sabado sa alas 9:45 sa gabii.
Ang duha ka drayber sa motorsiklo nga patay sa hitabo mao ang drayber sa Lunsen motorcycle kolor itom nga mao si Roel dela Cerna Vanguardia, 46, taga Logo, Borbon ug naangol ang upat ka mga pasahero niini apil na ang usa ka 7-anyos nga bata.
Patay usab ang drayber sa Kawasaki kolor itom nga si Alquin Commendador, 30, taga Lubo, Sogod.
Samtang ang upat ka mga pasahero nga naangol mao sila si Pedro Fortuna, 27, taga Apalan, Tuburan nga gihulagway'ng anaa sa kritikal nga kahimtang ug Maricel Onde, 28, taga Potat, Tuburan, Warly Deniga, 24, taga Potat, Tuburan ug ang 7-anyos nga si Janjen Romo.
Matud ni SPO1 Arsenio Coming Sr. sa Sogod Police Station sa dihang nahinabi sa Banat News nga paingon sa Tuburan aron maghatod sa mga pasahero si Vanguardia ug pag-abot sa nahisgutang lugar gikasugat niini ang motorsiklo ni Commendador nga gihulagway nga kusog kaayo ug mikawat sa pikas linya nga miresulta sa ilang panagbangga.
Matud pa tungod sa kakusog sa impact sa panagbangga sa duha ka motor nalabay ang mga sakay niini. Ang duha ka drayber dead on arrival sa Juan Dosado Memorial Hospital tungod sa grabeng kadaot sa ulo ug kalawasan.
Samtang ang upat ka mga pasahero apil na ang 7 anyos nakaangkon kini og mga pangos ug bun-og gawas lang ni Furtona nga gihulagway nga anaa sa kritikal nga kahimtang. (BANATNEWS)