CEBU, Philippines - Giangkon ni Capitol Security Consultant Byron Garcia nga iyang nadapog ang tangkugo sa usa kundoktor sa Ceres Bus Liners tungod kay nag-wild ug gikasukmagay niini ang usa sa security guard sa South Bus Terminal.
Sumala pa ni Garcia nga wala niya mapugnging madapatan ang konduktor nga naila sa pangalan nga Lovigildo Holgasan, 29, taga Calatraba, probinsiya sa Negros pasado alas 8:00 ang takna kagahapon sa buntag sa sulod sa South Bus Terminal.
Matud pa ni Byron unang nakit-an nga nakalalis ni Holgasan ang usa sa mga security guard sa terminal nga si SG Jaser Santos tungod kay wala mauyuni ni Holgasan ang bag-ong sistemang gipatuman.
Sigon sa report ang panaglalis sa duha misangpot sa pagdinumugay ug gani niakusar ang kundoktor nga gitiunan siya og armas ni Santos.
Apan si Byron nagkanayon nga nag-wild pag-ayo si Holgasan ug di magpapugong kay gusto gyung makigsukmagay sa gwardiya ug mikuha pa og parking sign aron unta makigpinusposay.
“Aron matauhan ug mokalma ang konduktor akong gihapak ang iyang tangkugo kausa ug nihilom,” sumala pa niini sa interbyu sa DyRF.
Gipanghimakak hinuon niining iyang gitamparos ang konduktor kay igo ra niyang gihapak ang tangkugo aron maulian gikan sa pag-wild niini.
Sumala pa niya iyang gipugos ang duha nga magpinasayloay apan ang konduktor buot gyud nga mopasaka og kaso batok sa gwardiya tungod sa pagpanion og armas. (Chester Abadilla) (BANATNEWS)