CEBU, Philippines - Gihinginlan na sa kagamhanan sa lungsod sa Cordova kadtong mga tawo nga tigpayuhot og shabu ug uban pang illegal nga kalihokan. Si Mayor Adelino Sitoy nga nahinabi sa Banat News miingon nga nailhan na nila ang mga nalambigit sa maong illegal nga kalihokan ug ug ila na kining gipakigsultihan. Giawhag usab niya ang kapolisan nga hingusgan ang kampanya batok sa ginadiling drugas pinaagi sa pagdakop ug pagpasaka og kaso niini sa suspetsado. Si Sitoy miingon nga nakighiusa na karon ang kapolisan sa mga barangay opisyal aron sa pag-ila sa mga molupyo nga nalambigit sa pagpayuhot og shabu sa ilang dapit. Matud pa sa mayor nga pipila kanila iya nang gipanghimangnoan sa paghunong na sa ilang illegal nga kalihokan ug kun dili sila makahimo sa paghunong, mas maayo pang mohawa nalang sila gikan sa maong lungsod.
Matud pa ni Sitoy nga ang iyang lakang maoy paagi aron daghang mga negosyante ang mobubo og pohunan sa negosyo diha sa Cordova. KUn modaghan ang negosyo sa lungsod, modako ang income sa buhis niini ug daghan usab ang makatarbaho, matud pa ni Sitoy.