CEBU, Philippines - Napaksit ang bagolbagol sa usa sa duha ka managsuon dihang gipamusil kini didto sa MJ Cuenco Avenue, barangay Hipodromo, ning dakbayan sa Sugbo sa miaging gabii.
Ang biktima mao si Jonde Morales, 22, usa ka lineman sa Rosch Sub-contractor, nga taga Hipodromo.
Nasayran nga ang biktima ug ang iyang igsoon nga si Manuel naghatod sa ilang higala aron pasakyon ngadto sa Mandaue sa dihang kalit lang silang gipusil sa wala hiilhing kriminal.
Matud pa sa kapolisan nga nakadagan pa ang biktima uban sa iyang igsoon dihang nabantayan niya nga mibuhagay na ang daghang dugo sa iyang nawong nga gikan sa walang bahin sa iyang ulo nga natapsingan sa bala.
Ang biktima gihatod dayon ngadto sa Vicente Sotto Memorial Medical Center samtang ang kriminal dali kaayong nakasibat.
Padayon pang gipangita karon sa kapolisan ang kriminal. – BANAT NEWS