Estudyante sa Talisay bantay sa kalikupan

CEBU, Philippines - Gitahasan sa kagamhanan sa Talisay ang grupo sa kabataan nga scholars sa pagbantay sa kalikupan sa maong dakbayan.

Si Konsehal Shirley Belleza mibutyag nga maong grupo gitawag nga Kusganong Kapunongan sa Kabataan alang sa Kalikupan (K4) kinsa gihatagan og libreng edukasyon sa kagamhanan diha sa Talisay City College (TCC).

Gipasabot sa konsehala nga ang K4 nga mga environmental scholars gihatagan usab og libreng swimming ug diving lesson ug gani bag-o lang silang migradwar.

Matud pa ni Belleza nga ang concept kun makagraduwar na sa ilang upat ka tuig nga kurso ang maong mga scholars, mahimo usab silang tigpanalipod sa kalikupan.

Sa milabay'ng tulo ka semana ang maong mga scholars didto pasawma sa Lagundi Reef atol sa ilang graduation dive.

Ang maong edstudyante, samtang nagpahimos sila sa libreng edukasyon sa TCC gisangonan usab silang mogalam sa kabaybayonan sa siyudad ug gitahasan usab sila sa pagtabang sa pagpahiuli sa Makatol Reef nga nahimutang diha sa barangay Pooc ug pagpanglimpiyo sa kabaybayonan sa siyudad, ingon man ang pagpahigayon og Mangrove nursery. Ang Makatol Reef dugay nang namatay tungod sa abuso nga gibuhat sa ubang mga mananagat kinsa mogamit og mga dinamita sa ilang pagpanagat.

Si Belleza midugang nga mangayo usab siya og tabang kang Kongresista Eduardo Gullas nga mahimong sayon ang plano nga butangan og screen ang mga boundary sa maong takot aron masala ang mga sagbot aron dili mahugaw ang maong lugar. – BANAT NEWS