Argao daghang armas nga ihalas

CEBU, Philippines - Giangkon sa kapolisan sa lungsod sa Argao nga daghan kaayong armas de fuego nga ihalas o walay lisensya sa maong lungsod apan dili gyud itahan sa katawhan ngadto sa kapolisan luyo sa gipanghingusgang kampanya kalabot niini.

Si PO1 Benjamin Gerozaga, sa Argao Police Station mibutyag sa Banat News kagahapon nga gawas sa mga armas nga ihalas, gikampanya usab nila ang bahin sa pagpa-renew sa lisensya sa mga armas nga lisensyado apan nabahas na.

Matud pa ni PO1 Gerozaga nga sa lungsod sa Argao namatikdan nila nga daghan kaayong armadong mga molupyo diha.

Gani matud pa niya niadtong miaging buwan, puerting kusoga sa pinusilay sa mga molupyo sa maong lungsod.

Apan nahibulong siya nga wala may gipanurender nga mga armas de fuego sa ilang buhatan.

Gumikan sa kagahi sa mga katawhan sa lungsod sa pagtahan sa ilang walay lisensyang mga armas, wala lang usab sila magbutang og drop box sa ilang opisina, matud pa ni PO1 Gerozaga.

Ang pagbaton og drop box nga ibutang sa atubangan sa usa ka police station, kasagaran gihimo kini sa ubang mga estasyonan sa kapolisan sa ubang kalungsoran aron pagdani sa mga armadong tawo nga motahan nga malinawon sa ilang mga armas de fuego nga wala nay daghang sukitsukit.

Apan sa bahin sa kapolisan sa Argao, wala sila mohimo niini kay nagtuo sila nga lisod nilang makombinse ang katawhan.

Kini tungod kay matud pa ni PO1 Gerozaga kasagaran sa armas sa panimalay gamiton kini sa panalipod sa kinabuhi sa tagbalay ug sa ilang kabtangan ilabi na kun sila panamastamasan.

Wala usab mabalaka ang kapolisan nga ang maong mga armas de fuego gamiton sa umaabot nga election tungod kay matag election namatikdan nila nga malinawon kaayo ang maong lungsod. Midugang usab siya nga lahi og kinaiya ang taga Argao kay kun magpinatyanay ang mga tawo diha, usahay magpabayad lang ang biktima.

Unya kun makahigayon, manimawos usab batok sa suspetsado o sa pamilya niini, busa nauso diha sa Argao ang estelo nga bawos-bawos lang, matud pa ni PO1 Gerozaga.

Unya matud pa niya nga mao usay gusto sa makapatay o sa suspetsado kay kun ipaagi pa sa husgado usahay mahal kaayo og singil ang abogado ug ang korte mas maayo pang magbinayranay nalang kay may diskuwento pa kun magkasinabtanay ang biktima ug ang suspetsado.

Apan ang kasagarang mahitabo diha nga kadtong mamatyan karong buwana, sa sunod higayon mao na usay makapatay gumikan sa panimawos nga ilang himoon niadtong nakapatay sa ilang pamilya.

Kini maoy hinungdan nga tagsa ray balay sa Argao nga walay armas de fuego kay giandam kini sa pagpanalipod sa kinabuhi ug kabtangan sa tagbalay, matud pa ni PO1 Gerozaga. – BANAT NEWS