Law students misuportang Erap

CEBU, Philippines - Ang mga estudyante sa College of Law sa nagkalain-laing unibersidad sa tibuok nasud mimugna og pundok nga Movement of the Youth for Empowerment, Reform, Advocacy and Progress kon “MyErap” diin nagpakita og kusog nga suporta kang kanhi Presidente Joseph Estrada.

Ang maong pundok ang natukod niadtong buwan sa Mayo niining tuiga nga nagsugod diha sa internet, may mga miyembro na nga mokabat na sa 2,000 sa tibuok nasud.

Sa gipahigayong press conference niadtong Sabado sa gabii diha sa Fine Cuisine sa Park Mall, dakbayan sa Mandaue, si Ginno Jaralve kinsa maoy tigpamaba sa MyErap sa tibuok nasud, mibasa sa pamahayag sa ilang organisasyon diin tipik niini mao ang ilang pagtuo nga ang pagpangatake batok kang Estrada gihimo sa kanhi grupo nga mipalagpot kaniya gikan sa katungdanan.

Karong nakabantay sila nga dako kaayo og purohan nga mahibalik sa pagka-presidente sa nasud si Estrada, ang oposisyon mihimo dayon og lakang sa pagdaot sa pagkatawo sa kanhi Pamuno nasud.

Kining MyErap nga grupo, hugot nga mipadayag sa ilang lig-ong suporta sa kandidatura sa pagka-presidente sa nasud ni Estrada ug nagtuo usab sila nga kadaghanan karon sa mga Pinoy dili na mamati sa mga pagdaot ug mga propaganda batok kang Estrada. Si JV Ejercito, mayor sa San Juan, anak ni Estrada kinsa mitambong usab sa maong press conference nagkanayon nga dihang ang iyang amahan mikompirma nga modagan sa pagka-presidente sa nasud, misugod na usab ang mga pagpangatake batok kaniya, ug busa iyang gipanghinaot nga makalingkawas sila sa mga pagsuway nga ilang giatubang.

Gihimakak sa mayor sa San Juan ang mga pasangil batok sa iyang amahan nga naglimbigit og nagkadaiyang krimen nga gimugna sa iyang mga kaatbang sa politika.

Si JV mipasabot sa iyang kasagmuyo ngadto sa mga sakop sa media nga mitabang sa pagpadako sa mga isyu nga batok sa iyang amahan.

Apan iyang gipadayag nga bisan pa sa mga kontrobersiya batok sa iyang amahan daghan gihapon kaayong mga misuporta niini ug mapasalamaton siya sa mga nagpasiugda nga mitukod sa grupo nga MyErap.

Si JV mitataw usab nga wala siya’y planong modagan sa taas nga posisyon sa sunod tuig tungod kay ang iyang igsoon nga si Jinggoy Estrada magpasubli man gihapon sa pagkasenador. – BANAT NEWS