Gitun-an pa karon sa mga tinugyanan sa Commission on Human Rights (CHR)7 ang lakang nga ilang buhaton niining kiha nga gisang-at sa mga mag-uuma sa bukirang barangay sa dakbayan sa Sugbo batok sa usa ka heneral sa kasundalohan nga may mga goons kuno nga kanunay'ng nanghasi kanila.
Kini human ang 69 ka mga mag-uuma nga sakop sa Tabunan Taptap Cantipla Farmers Association(TTCFA) mipadala og suwat ngadto kang Regional Director Alejandro Alonzo sa CHR 7 kay matud pa kanunay silang gihasi sa mga goons ni retired General Tiburcio Fusilero.
Matud pa sa maong mga mag-uuma nga gipanghulga sila sa mga goons ni Fusilero kay pabiyaan kanila ang ilang mga kaumahan sa maong mga lugar nga gitikad nila sulod na sa mga 20 kapin ka tuig.
Ang labing nasakitan sa mga mag-uuma mao ang pagkapriso sa unom nila ka kauban kay gipabalhog kini ni Fusilero sa kasong illegal cutting of trees.
Usa sa unom ka mga mag-uuma nga nakapuyo gyud og tagduha ka buwan sa mabugnaw kaayong prisohan mao si Gomercendo Alcantara.
Nakagawas lamang sila human makabayad og tag P9,500 nga piyansa human sila tabangi sa mga abogado sa Farmers Development Center (FARDEC), usa ka non governmental organization (NGO).
Miingon ang mga mag-uuma nga kanunay silang nagkurog kay puwerting daghana og armas niining mga goons ni Fusilero nga matud pa naay mugbo ug tag-as nga mga klase sa armas de fuego.
Sa pagkakaron ang CHR nangita og paagi nga ilang maimbistigar si Fusilero aron sayron kun unsa ka tinuod kining sumbong sa mga mag-uuma. (BANATNEWS)