Cebu mosuporta sa Cheaper Medicines Act

CEBU, Philippines - Andam motabang ang kagamhanan sa dakbayan sa Sugbu alang sa malungtarong pagpatuman sa Akta Republika 9502 kon ang Cheaper Medicines Act kini maoy gibutyag ni Konsehal Joey Daluz, ang vice chairman sa Committee on Health and Hospital Services sa City Council.

Ang nahisgutang balaud hingpit nang   gipatuman ug mag-atubang unya og kaso ang mga botika nga makalapas niini.

Ubos sa Cheaper Medicines Act, paubsan og 50 porsiyento ang presyo sa labing minos 21 ka mga tambal ilabi na niadtong antihypertensive, anticholesterol, antibiotic drugs ug uban pa.

Kadtong mapakyas ug magdumili pagtuman niini   mahimong mag-atubang og multa ug posibleng pagkabilanggo.

Matud ni Daluz nga gikinahanglan lang nga mangayo og tabang sa kagamhanan sa dakbayan ang Department of Health (DOH) nga maoy nipatuman sa balaud.

“Tingali ang DOH mangayo sab og tabang namo sila may head agency pag-implementar ani, mahimo man nga himuon ni natong requirement to enforce gyud ba,” sumala ni Daluz.

Nagduda ang konsehal nga dili molahutay ang hingpit nga pagpatuman sa nahisgutang balaud kung dili magpatabang ang implementing agency sa lokal nga kagamhanan.

Ang price cut gisugdan pagpatuman sa DOH niadtong miaging buwan apan ang full implementation niini gisugdan niadtong Lunes.

Kini nagpasabot nga ang tanang mga botika lakip na sa gitawag og small and medium-size drugstores ug hospital pharmacies motuman na sa balaud.

Nagtuo hinuon si Daluz nga taas ang compliance rate sa Cheaper Medicines Act tungod usab sa information dissemination nga gihimo alang niini.

Bugtong pagduda sa konsehal kung molahutay ba ang DOH pag-monitor sa mga botika lukop nasod alang sa pagpatuman sa nahisgutang balaud.