Guidelines sa angaya'ng piliong kandidato ipagawas

CEBU, Philippines - Mopagawas na og guidelines ang Task Force for Life alang sa mga kandidato nga suportahan sa Simbahang Katoliko sa sunod tuig nga eleksyon. Matud sa pangulo sa task force nga si Doctor Rene Josef Bullecer nga ang guidelines mao usab unya ang mamahimong sumbanan sa mga botante. Kini aron dili mapili ang mga kandidato nga kadudahan og baruganan o kadtong nipaluyo sa mga balaudnon nga nahasupak sa pagtulun-an sa simbahan. Partikular na niini ang kontrobersyal nga Reproductive Health Bill nga hugtanong gisupak sa kadagkuan sa Simbahang Katoliko ug kini gipaabot nga ilang ipagawas karong mosunod nga duha ka semana. Sa mga pangalan sa mga presidentiables nga milutaw niining higayuna miingon si Bullecer nga wala pa kanila ang matawag nga pro-life. Nasayran nga si Senador Benigno “Noynoy” Aquino sa oposisyon mipabor sa pagpalabang sa Reproductive Health Bill nga nag-ungot karon sa Kongreso. Samtang ang posibleng higpit nga ikaatbang niini nga si Gibo Teodoro sa administrasyon mipadayag usab og dili maayong komento batok sa simbahan. Malaumon si Bullecer nga pinaagi sa ilang ipagawas nga guidelines nga paaprubahan usab sa simbahan, magiyahan ang mga botante sa pagpili og mga kandidato. (BANATNEWS)