CEBU, Philippines - Kritikal ang kahimtang sa usa ka ginang human kini giunay og dunggab og tigib makadaghang higayon sa iyang bana nga gituohang nasakit og nervous breakdown sa barangay Liki lungsod sa Sogod niadtong Biyernes sa alas 7:10 sa gabii.
Kritikal ang kahimtang sa usa ka ginang human kini giunay og dunggab og tigib makadaghang higayon sa iyang bana nga gituohang nasakit og nervous breakdown sa barangay Liki lungsod sa Sogod niadtong Biyernes sa alas 7:10 sa gabii.
Ang biktima mao si Rosita Danao Lauron, 40, asawa sa suspek nga si Euliver Lauron, 31, nagpuyo sa nahisgutang lugar.
Matud ni SPO3 Reynaldo Branzuela sa Sogod Police dihang nahinabi sa Banat News ang biktima kalit lang gisugat og dunggab makadaghang higayon sa bana sa gikuptan niining tigib sa dayong sulod sa balay.
Ang biktima nakaangkon og daghang samad dinunggaban sa iyang dughan, tiyan ug uban pang bahin sa kalawasan ug bukton ug daling gitabang sa mga silingan ug gihatod sa Juan Dosado Hospital sa barangay Damulog.
Apan tungod sa kadaghang mga samad dinunggaban gibalhin kini sa tambalanan dinhi sa dakbayan sa Sugbo alang sa dugang medikasyon.
Samtang ang suspek nadakpan sab dayun sa nirespondeng mga polis ug gibalhog sa detention cell samtang nagpaabot sa tukmang sumbong nga ipasaka batok niya.
Gibutyag sa suspek atol sa gihimong pagsukit-sukit sa kapulisan gipasanginlan niya ang iyang asawa nga nagtinguha pagpatay kaniya hinungdan nga iyaha kining gi-unhan sa pagdunggab.
Dugang nahipos nga impormasyon sa kapulisan nga ang suspek nag-antos kini sa sakit nga nervous breakdown.
Gikatahong sa sayo pa nianang adlawa midangop na sa kapolisan ang biktima aron ipa-blotter ang “lain” na kaayong linihukan sa iyang bana nga iyang gikahadlukang basin dunay dautang himuon, apan gumikan kay wala paman gyud mahimong bayolente gipapauli lang ang biktima. (BANATNEWS)