Motor vs bus, 1 patay

CEBU, Philippines - Patay nang nadangat sa tambalanan ang usa ka lalaki human masaghid ang iyang motorsiklo sa usa ka Ceres Bus niadtong milabay’ng adlaw sa barangay Talaga lungsod sa Argao. Ang namatay giila sa kapulisan nga si Wilson Hornada, taga barangay San Agustin, Alcoy human makaangkon og kadaot sa kalawasan ug ulo human ang iyang motorsiklo nasaghid sa bus nga gimaneho ni Elfredo Aypana taga Punta Princesa ning dakbayan. Si PO1 Benjamin Herosaga, sa Argao Police Station nga gikahinabi sa Banat News nagkanayon nga ang bus paingon dinhi sa dakbayan sa Sugbu gikan sa lungsod sa Santander.

Samtang ang biktima nga si Hornada, nagsakay sa iyang motorsiklo uban sa babayeng pasahero nga wala maila ang pangalan nagsunod sa maong bus. Matud pa ni PO1 Herosaga, ang driver sa bus nga si Aypanan gikatahong kalit lang mihunong sa Talaga atubangan sa simbahan human dunay usa ka babayeng mipara aron mosakay.

Ang biktima nga si Hornada nga kusog sa pagpadagan ug nagsunod misuway unta og overtake sa bus apan dunay laing gikasugat niini hinungdan nga milihay ug didto mipilit sa kilid sa luyong bahin sa bus.

Human sa maong insidente gidala unta ang biktima sa Isidro Kintanar Memorial Hospital apan walay swerte tungod kay gideklarar siyang dead-on-arrival. (BANATNEWS)