Miss Gay immoral - Vidal
CEBU, Philippines - Gihulagway ni Cebu Archbishop Ricardo Cardinal Vidal nga malaw-ay ug immoral ang pagpahigayon og Miss Gay diha sulod sa kombento sa simbahan sa Lindogon sa Simala, Sibonga.
Hinungdan nga walay himuong imbestigasyon ang Artsidiyosisi sa Sugbu sukwahi sa pamahayag sa media liaison officer sa Simbahan sa Sugbu nga si Msgr. Achilles Dakay niadtong milabay'ng adlaw'ng Biyernes.
Kini gumikan kay pulos lang estorya ang nadunggan ni Vidal kabahin sa gipasangil ni Frater Paul Mary batok sa iyang mga kaubanan lakip na sa iyang superior nga si Frater Martin.
Si Vidal sa ambush interview sa mga tigbalita kagahapon atol sa ika-75 ka kasumaran sa pamantalaang “Ang Bag-ong Lungsoranon” miingon nga maong walay imbestigahan kini tungod kay wala pay pormal nga misang-at og reklamo batok sa maong mga monghe.
Si Frater Paul Mary kon Venancio Cabillon midangop sa media ug mibutyag sa mga gihulagway niyang kahiwian sa mga kaubanang monghe nga gihimo diha sa Lindogon.
Daan nang gisaway sa Episcopal Vicar nga si Msgr. Esteban Binghay ang gihimo ni Cabillon ug kaubanan pagdangop sa media sanglit matud pa niya walay mahimo sa maong kaso ang media.
Sumala pa ni Binghay nga mas maayong sa Artsidiyosisi o ba kaha didto sa Vatican sa Roma miduol ang maong mga mongheng mireklamo sanglit ang maong mga kadagkuan sa simbahan ray makahatag og solusyon niini.
- Latest
- Trending
