Kapin 20 ka vintage shells naugkat sa Lagundi

CEBU, Philippines - Sobra sa 20 ka mga vintage shells ang nakuha kagahapon sa grupo sa mga divers nga polis gikan sa Provincial Police Office bomb disposal unit ug Special Weapons and Tactics (SWAT) sa Cebu City Police Office ug Mandaue City gikan sa Lagundi Reef sa barangay Poblacion dakbayan sa Talisay.

Ang maong retrieval operation kabahin sa pagsaulog sa International Cleanup Drive nga gihimo sa nagkadaiyang bahin sa nasud kagahapon ug kini gipasiugdahan ni Konsehal Shirley Belleza.

Usa usab sa mga misawom ug mitabang og kuha sa maong mga bomba mao si Peter Coleman usa ka kanhi US Army Special Forces nga weapons expert.

Si Coleman maoy mipahibawo kang Belleza, chairman sa Tourism Historical and Heritage Council sa siyudad nga kinahanglang kuhaon ang maong mga bomba gikan sa lugar paglikay sa disgrasya human niini makita sa ilawom sa milabay'ng pag-dive niini sa dapit ang maong mga bomba.

Si Coleman nga nahinabi sa Banat News nagkanayon nga dihang mi-dive siya sa lugar uban kang Anthony Nator nabantayan niya ang maong mga bomba ug dihang iyang gisusi dako ang iyang pagtuong mobuto pa ang uban niini.

Si Belleza nangayo og tabang kang Supt. Henry Biñas nga mopadala og grupo sa bomb experts ug police divers sa maong dapit aron kini makuha ug ma-dispose sa mas luwas nga lugar.

Ang maong mga bomba naputos na og mga gasang, apan duna pa gihapoy maayo pa ang casings ug maoy gidudahang aktibo pa ug mobuto, sumala pang Coleman nga ang teknolohiya sa paghimo sa mga bomba ug bala niadtong ikaduhang gubat sa kalibutan dili pa ka susama ka luwas sa panahon karon.

Mipasidaan si Coleman nga bisan paman og daghan na og buslot ug tayaon wala kini magpasabot nga di na mobuto, butang nga giuyonan ni PO3 Reynaldo Solante sa Special Reaction Unit nga usa ka bomb expert.

Ang hepe sa SWAT sa CCPO nga si Chief Insp. Arnel Banzon kinsa mikuyog sa retrieval nagkanayon nga dili gyud kini angayang tipigan pa ug kinahanglang ma-dispose kini dayon tungod sa peligro.

Pipila sa mga nakuha mao ang mga fuselage sa rockets, mga tumoy sa bombang duna pay fuze ug uban pang parte sa mga bomba ug mortar rounds sama sa 60 millimeter ug 105 howitzer shell.

Si Belleza nagkanayon nga nabalaka siyang dunay madisgrasyang taga Talisay tungod niini tungod sa mga report nga dunay nanguha niini sa ilawom ug gidala sa ilang mga balay.   (BANAT NEWS)