2 ka kapitan para sa TOBOY award

CEBU, Philippines - Duha ka barangay kapitan sa dakbayan sa Sugbu ang gipilian karon sa komitiba nga gihulma sa Department of Interior and Local Government (DILG) sa siyudad, nga molangkob sa Ten Outstanding Barangay Officials of the Year (TOBOY) awards. Kini maoy gibutyag ni Cebu City DILG Director Patricio Gabuya gawas sa mga konsehal sa kabarangayan nga giduso usab nga mamahimong awardees niining tuiga.

Matud pa ni Gabuya nga higpit nga nag-ilog sa luna alang sa barangay kapitan mao si Luz barangay captain Nida Cabrera ug ang barangay kapitan sa Basak Pardo nga si Dave Tumulak.

Apan miingon si Gabuya nga napili na nila ang SK chairperson sa barangay Kalubihan nga si Mary Mylane Legaspina alang sa SK. Midugang si Gabuya nga lakip sa ila nang napili alang sa barangay treasurer mao ang mamahandi sa Mambaling nga si Ivy Gabiana.

Samtang sa pagsuwat ning balita padayon pa nga nihashas ang komitiba nga gitahasan ni Gabuya alang sa nominadong mga barangay konsehal.

Nalilian hinuon sa Banat News nga nakabintaha si Cabrera kang Tumulak tungod kay duha sa lima ka sakop sa komitiba ang nipili na sa kapitan sa barrio Luz.

Nagkanayon ang City DILG Director nga karong adlawa na masayran ang kompletong listahan sa napulo ka barangay officials nga modawat sa TOBOY awards. “Ang ato gyung purpose ani is to encourage the barangay officials to perform their duties and functions well ba,” sumala ni Gabuya.

Lakip sa gibasihan sa pagpili sa mga awardees mao ang ilang records lakip na sa implementasyon sa mga batakang serbisyo diha sa barangay ug uban pa. Nagkanayon si Gabuya nga ang mga awardee sa siyudad automatic nga mamahimong nominado sa TOBOY awards alang sa regional level. – BANAT NEWS