Analista: Gibo di mani-maho batok Noynoy

CEBU, Philippines - Gitino sa mga politikanhong analista nga dili gyud manimaho ang standard bearer sa kampo sa administrasyon nga si Defense Secretary Gilbert “Gibo” Teodoro batok sa kang Senador Benigno “Noynoy” Aquino III ang standard bearer sa Liberal Party karong umaabot nga piniliay sa 2010.

Napanglantawan kini ni Dr. Francisco “Dodong” Nemenzo, kanhi presidente sa University of the Philippines (UP) ug usa usab ka political analyst kinsa nagkanayon nga layo ra kaayo og biya si Gibo kang Noynoy nga iyang ig-agaw.

Ang gibasehan ni Nemenzo mao ang labing bag-o nga survey sa Pulse Asia diin 50 porsento ang mipabor kang Noynoy nga mahimong sunod nga presidente sa nasud itandi sa kang Gibo nga 3.2 percent.

Apan gitataw hinuon ni Dr. Nemenzo nga ang maong survey dili sa tibuok nasud kay didto ra kini sa Luzon ug walay labot ang Sugbu.

Matud niya nga kundili gyud mosaka ang rating ni Teodoro karong siya nay standard bearer sa Lakas-CMD-Kampi posibling dunay laing ituboy sa pagka presidente ang administrasyong Arroyo ug kini adto mokuha sa taga Opposition. – BANAT NEWS