CEBU, Philippines - Mokapin sa usa ka gatus ka libo ka mga partisipante ang gipaabot nga mo-uban sa ipahigayong Alay Lakad 2009 dinhi sa dakbayan sa Sugbo ugmang adlawa.
Si Kenneth Casquejo, presidente sa Alay Lakad Foundation Inc. dinhi sa Sugbo nga nahinabi sa Banat News miingon nga ang duha ka starting point sa kalihukan mao ang Plaza Independencia ug Fuente Osmeña.
Lakip sa gipaabot nga manguban sa Alay Lakad mao ang mga tinun-an sa nagkadaiyang tunghaan sa dakbayan, non-governmental organizations ug lainlaing sektor.
Mag-abot ang manguyog sa kalihukan anha sa Cebu City Sports Center diin usa ka programa usab ang pagahimoon sa alas 8 sa buntag.
Nagkanayon si Casquejo nga ang tumong sa Alay Lakad mao ang paghipos og pundo nga igasto alang sa mga scholar ug sa uban pa nilang mga programa.
Sa kasamtangan, ang Alay Lakad Foundation nagpa-eskuwela og kapin sa 20 ka mga estudyante sa kolehiyo ug kursong teknikal.
Andam hinuong mohatag og counterpart fund ang kagamhanan sa dakbayan sa mahipos unya nga pundo sa foundation subay sa ipahigayon niining kalihukan.
Sa pikas bahin, andam na usab ang Cebu City Traffic Group ug ang City Traffic Operations and Management (Citom) sa ipatuman niining traffic rerouting atol sa Alay Lakad 2009. Sirad-an ang right lane sa Osmeña Boulevard gikan sa Fuente Osmeña hangtod sa dalan Sanciangko. – BANAT NEWS