Gabriela nanginlabot sa pang-harass ni Miguel

CEBU, Philippines - Nanginlabot na ang grupo sa kababayen-an dinhi sa Sugbo nga Gabriela sa kontrobersiya nga gilambigitan sa anak ni Mayor Tomas Osmeña nga si Miguel.

Si Miguel gipasanginlan nga nang-harass ug nanghulga sa amiga sa iyang hinigugma gawas sa pagpusil sa camera niini. Kini tungod sa pasangil nga gibiyaan ni Samantha Elise Diores Benitez ang uyab ni Miguel nga si Bea Villegas nga nahubog atol sa ilang panag-inom sa Bakak bar atbang sa University of San Carlos Main.

Matud sa chairperson sa Gabriela-Cebu nga si Lenny Ocaciones nga kinahanglang barugan ni Benitez ang ilang reklamo human mupahibalo ngadto sa media.

Gipasalig ni Ocaciones ngadto sa pamilyang Benitez nga andam mosuporta ang Gabriela sa higayon nga ipasaka ang kaso batok kang Miguel.

“Ang Gabriela nanawagan aning biktima nga mobarug sa ilang katungod kay ila na man ning gibutyag sa media and we will always be there for them,” sumala ni Ocaciones. Gipadayag usab sa chairperson sa Gabriela nga wala na kinahanglana nga mo-leave o moluwat si Osmeña sa katungdanan tungod sa maong kontrobersiya. Kini tungod kay ang mayor tua sa gawas sa nasud ug on-leave niining higayona, apan giingon ni Ocaciones nga nagpabilin gihapon ang impluwensya niini.

Bugtong hangyo sa Gabriela ngadto kang Osmeña nga ipatigbabaw niini ang interes sa publiko pinaagi sa pagpasiugda og dinalian ug patas nga imbestigasyon.

“Iyang ipatigbabaw ang interes sa publiko. Karon ang interes sa publiko mao nga matugkad unsa gyud ang kamatuoran guilty ba ang iyang anak o dili sa pagpang-harass aning batan-on nga babaye,” si Ocaciones miingon.

Ang mayor una nang mipakawalay-sala kang Miguel uban sa pagbahad nga mokiha niadtong midaot sa dungog sa iyang bugtong anak.

Dili usab mopasiugda og pakisusi si Osmeña labot sa pagkalambigit sa iyang anak sa kontrobersiya tungod kay kini giingong usa ka self-serving. – BANAT NEWS