Duha ka taxi driver gitulis

CEBU, Philippines - Duha ka taxi drayber ang nawad-an sa ilang tibuok adlaw'ng kinitaan human mabiktima sa pagpanulis sa armadong mga lalaki sa barangay Jagobiao sa dakbayan sa Mandaue.

Si SPO1 Kerwin Bejer sa kapolisan sa maong dakbayan miila sa mga biktima nga mao sila si Rogelio Iyo, 40, taga dalan Sikatuna sa dakbayan sa Sugbo ug Tomas Ararao, 40, taga Pardo, dakbayan sa Sugbo.

Si SPO1 Bejer miingon nga ang unang biktima nga si Eyo nga nagmaneho sa Scorpion Taxi aron maghatud sa   duha ka wala mailhing lalaki gikan sa dakbayan sa Sugbo nga magpahatud sa Consolacion.

Apan sa pag-abot sa barangay Jagobiao kalit gitionan og armas ang biktima ug mideklarar nga tulis ug gikuha ang iyang P1,500, cellphone ug relo dayon nagdaling nanganaog.

Si Ararao nga drayber sa Juscar Taxi gisakyan usab og duha ka wala mailhing lalaki sa miaging gabii diha sa Ayala Business Park sa dakbayan sa Sugbo ug nagpahatod gihapon sa lungsod sa Consolacion.

Pag-abot gihapon sa Jagobiao kalit gitionan og armas ug mideklarar og tulis ang mga pasahero ug gikuha ang iyang P1,600 nga kinitaan.

Ang kapolisan misusi na kun mao ra ba gihapon kining mga tawhana ang mibiktima sa duha ka drayber. – BANAT NEWS