Nagpailang anak og polis nanulis

CEBU, Philippines - Duha ka lalaking giingong nanulis, usa kanila anak og polis nasikop human kini gukda sa mga biktima kagahapon sa kaadlawon sa Banilad Road barangay Kasambagan apan nasikop sa mga gwardiyang nagpatrolya.

Ang mga nadakpan giilang sila si Roel Montellano, 29, taga sitio Mansanitas B. Rodriguez samtang ang usa nailhan nga si Gersam Armecin, 22, nagpuyo sa Nivel Hills, Apas nga nagpailang anak og polis.

Ang duha gitumbok nila ni Manilo Go ug Manuel Madrio maoy mitulis kanila samtang nagpaabot og sakyanan sa Banilad Road gamit ang .38 kalibreng gition ni Montellano ug dayong kuha sa ilang mga cellphone ug pitaka.

Ang mga suspek mipasirit og padagan sa ilang motor nga gimaneho ni Armecin paingon sa IT park apan gisundan sila sa mga biktima ug nagpatabang sa mga gwardiyang sila si Arnel Barcial ug Arnold Sumaylo hinungdan sa ilang pagkasikop.

Matud pa ni SPO1 Ulysis Ragasa sa Cebu City Theft and Robbery Section (TRS) sa pakighinabi sa Banat News kasong robbery ang ilang ipasaka sa duha samtang nabawi usab ang mga butang sa mga biktima. – BANAT NEWS